تم النشر فى : الاثنين، 18 يناير 2021
الناشر : مؤسسة الوطن العربى الإعلامية - لندن ، المملكة المتحدة . WA MEDIA FOUNDATION - LONDON, UK
لجام - كلمات الشاعر : طه إبراهيم
لجام - كلمات الشاعر : طه إبراهيم
الوطن العربى اليومية - لندن..
لجام - كلمات الشاعر : طه إبراهيم
*************
أدور ف عقلي وفين الكلام
واهيص وازعق ف وش المدام
وازعّل ولادي وارمي السهام
واخاصم واصالح ف عز الهيام
وحالي يلخبط عقول الكرام
واشخبط ولخبط وارسم حمام
واحس إني جاهل وناقص علام
واحس إني عايز أبطل كلام
وادور ف نفسي مفيش إنسجام
وفكره تجيلي وتجري أوام
وادور عليها ف بطن الظلام
واصرخ وهيص يا عالم حرام
نفسي قصيده تكون الختام
واقول الحقيقه برغم الالام
لساني معاند ولابس لجام
وعامل مطنش ورافض ملام
وباع الحكايه ف وسط الزحام
وسابني لوحدي وقالي سلام
ياغاوي المشاكل كفايه صدام
هاتفضل مكابر وعامل هُمام
وتنفخ في قربه وعايز لحام
وتقطع ف قلبك بدون إهتمام
وتدّن ف مالطه ياسيدنا الامام
وصوتك يجلجل ف وسط النيام
ومين اللي يصحي يقولك تمام
ومين اللي فاهم في شعرك كلام
ومين اللي يقدر يرد الليئام
ياريتك تبطل وترمي سلام
وتنسي شعورك وتنسي الهيام
وترجع لنفسك وتترك أوام
وتحضن ولادك وترضي المدام
وتحسب معاها البطاطس بكام
وتمسح وتضبخ بكل احترام
هلتقي الموده وتلقي الغرام
وحبة سبانخ يرموه العظام
وتتخن وتتأل ف عز الصيام
وتقفل دماغك وآخر تمام
وتمسك لسانك هتلقي السلام
وراسك ف ريشك كأنك نعام
وخالد يصحبك وعمك حسام
وتلقي حياتك ف وسط العوام
منعّم مدلل وتعرف تنام
ياريتك تقرر يا سيدنا الامام
************