تم النشر فى : الخميس، 30 مايو 2024
الناشر : مؤسسة الوطن العربى الإعلامية - لندن ، المملكة المتحدة . WA MEDIA FOUNDATION - LONDON, UK
تعالى نعِدّ شهدانا - قصيدة الشاعر دكتور طارق النجدي
"تعالى نعِدّ شهدانا"
قصيدة الشاعر دكتور طارق النجدي
تعالى نعد شهدانا..
ومين مجروح
ومين مبتور ..
ومين مكسور ..
ومين عايش بيتفرج علينا ..نموت
تعالى نعد ف بيوتنا
مساجدنا وكنايسنا
ومين جاب لنا أكفان
ومين شاركنا ف الأحزان..
و مين بدموعه بيصرّح ومين بالكلمة ..بيصرّح
ومين قاعد على الشاشات ..
كما الأموات..
ويتفرج على خيبته
على هيبته
ويبرُم فى شَنَاباته ..
ويلعب ويا بناته ..
وأهله ف الخيام عايشين ..
تعالى نعد شهدانا
تعالى نعد فى فلوسنا
وف" تيوسنا "
آلاف شهداء..
تيوس ملايين..!
تعالى نعد في السلاطين و ف الرؤسا و ف الأمراء
ومين باتت عينه حمرا..
و غزة يدوب بقت جمرة..
شفايفه يدوب تقول
تقول الله وبسم الله
وبتحوقل ..
بقينا حريم ..
لا والله حاجة تانية ..
حريم إزاي
ده عيب..وحرام بنصلى ..نحج..نصوم
و قبل الفجر
كمان بنقوم
يا مولانا يا بو العمة
فين الهمة..
فين الأحاديث..
يا رب
يا رافع السموات
خد الشهداء
خلي لنا العرب أموات .!!
يجوز في قبرهم
يصحوا ..
لكن شايف
تيوس.. ملايين ..
مش عارف بتقصد أيه..؟!
نذوق الذل
مش حاسين..
نذوق القهر ..
مش قادرين
نقول الآهة ..
ليه ساكتين
حتى الآهة مكتومة
و محرومة
يا حسرة عمرنا الضايع على الشاشات
......
خد عيونى وبيها شوف ..
لمع مرايتك
يا بن حمزة ..
يا بن خالد ..
يا بن ناصر والسادات
ارمى الولاد في النار شوية ..
ح يطلعوا
زي اللى صاد الدبابات
مش غريبة ومش بعيد ..
رمضان ..و اكتوبر
فى راسي ح تنفجر
معقولة ..احنا اللى عبرنا ويوم صبرنا
ف نمرة ستة ع القنال ..
معقولة بنعد
اللى ماتوا ..
و نقول سلام
قول على الدنيا السلام
واضرب لهم تعظيم سلام
نوبة شهيد ..
واعمل فرح
مليون شهيد ..
لابسين كفن ..
مستنيين صرخة رجال ..
زي اللى قال
عدوا القنال
لسه قاعدين ع القهاوي..
يا حسرتى
يا ماه خسارة اللقمة فيهم ..
الخوف ماليهم
عد التيوس
عد الفلوس ..
عد الدموع
عد الآهات..
وزع طُرَح ..
وإياك تقول اليوم عزاء
لا عزاء للسيدات
لا عزاء للباشاوات
و الأغاوات ..
خلاص يا باشا..
ما فيش رفح ..
الموت طفح ..
خلاص يا باشا
ما فيش "جنين".
مات الجنين ..
اشطب كمان كلمة
"حماس" .
خليها بس ف ماتش كورة..
وزّعْ طرح ..
مات اللى مات
اهو مات شهيد
عاش اللى عاش
اهو عاش شريد
لكن يا غزة وربي شاهد ..
ح افضل أغنى لك
و اصحّى ف اللى مات ..
انا مش مسيح ..
ولا انت مريم ..
دمى يسيح ..
وتعيش يا أم الرجال
تعيشى يا ..أم الرجال
.png "English"){kind=small}
.png&contenttype=png)
